Rektorët ndër vite

Prof. Dr. Xheladin Draçini është Rektori aktual i Universitetit të Mjekësisë, Tiranë, duke marrë këtë detyrë në gusht të vitit 2024. Para emërimit si Rektor, ai ka shërbyer si pedagog me kohë të plotë pranë Departamentit të Kirurgjisë dhe si mjek kirurg primar në Qendrën Spitalore Universitare "Nënë Tereza" në Tiranë. Me një karrierë të gjatë akademike dhe profesionale, Prof. Draçini ka kontribuar ndjeshëm në kërkimin shkencor, me pjesëmarrje në konferenca, publikime në revista shkencore brenda dhe jashtë vendit, si dhe autorësi në monografi dhe tekste mësimore. Si Rektor, ai ka për qëllim përmirësimin e cilësisë akademike dhe formimin e specialistëve në fushën e shkencave të shëndetit.

Prof. Dr. Arben Gjata është Rektori i tretë i Universitetit të Mjekësisë, Tiranë. Pas marrjes së detyrës në muajin qershor 2015, në zgjedhjet e realizuara më datë 20 prill 2016, Prof. Dr. Arben Gjata u shpall si Rektori i parë i zgjedhur i këtij Universiteti. Prof. Gjata udhëheq krijimin e standardeve më të larta profesionale dhe përgatitjen e profesionistëve të shëndetit në këtë Universitet të rëndësishëm të vendit.

Rektori i dytë i Universitetit të Mjekësisë, Tiranë ishte Prof. Dr. Ali Refatllari, kardiokirurg i mirënjohur, i cili udhëhoqi Universitetin e sapokrijuar dhe kontribuoi në zhvillimin dhe njohjen e mëtejshme ndërkombëtare të këtij Universiteti elitar.

Me krijimin e Universitetit të Mjekësisë, Tiranë, Rektore e parë e këtij Universiteti u emërua Prof. Dr. Jera Kruja, e cila ishte Rektorja e parë femër në Historikun e Universiteteve të Republikës së Shqipërisë. Ajo kontribuoi për krijimin e bazave dhe mbarëvajtjes së punës në Universitetin më të ri të vendit.