Fjala përshëndetëse e Rektorit të Universitetit të Mjekësisë, Tiranë Prof. Dr. Xheladin Draçini për fillimin e vitit akademik 2025-2026 gjatë Ceremonisë së Bluzave të Bardha.

E nderuar Ministre e Shëndetësisë dhe Mbrojtjes Sociale, znj. Evis Sala,

Të nderuar kolegë pedagogë,

Të dashur studentë,

Ceremonia e Bluzave të Bardha është një nga momentet më të veçanta në jetën akademike të studentëve tanë, sepse shënon jo vetëm një hap përpara në rrugëtimin e tyre drejt profesionit, por edhe një premtim solemn ndaj shoqërisë.

Bluza e bardhë është më shumë se një uniformë. Ajo është simbol i besimit dhe i përgjegjësisë. Duke e veshur atë, studentët tanë pranojnë të bëhen mbrojtës të jetës, të përkushtuar ndaj së mirës së pacientit dhe të palëkundur në respektimin e etikës dhe humanizmit.

Në këtë udhëtim, ata nuk janë vetëm. Ata mbështeten në traditën akademike të Universitetit të Mjekësisë, Tiranë, në përkushtimin e pedagogëve të tyre dhe në mbështetjen e institucioneve, ndër të cilat një rol thelbësor ka Ministria e Shëndetësisë dhe Mbrojtjes Sociale.

E nderuar Ministre, prania Juaj sot është një dëshmi e fortë e rëndësisë që shteti i jep formimit të brezit të ri të profesionistëve të shëndetit. Ne jemi krenarë që misioni ynë për të formuar mjekë, infermierë dhe specialistë të aftë lidhet ngushtë me vizionin e Ministrisë që Ju drejtoni – për një sistem shëndetësor më të fortë, më të drejtë dhe më afër qytetarëve.

Të dashur studentë, sot nisni një rrugë ku do të përballeni me momente suksesi, por edhe me sfida e sakrifica të mëdha. Do të ketë ditë të gjata studimi, net pa gjumë, raste që do t’ju bëjnë të dyshoni tek vetja, por edhe çaste që do t’ju mbushin me krenari dhe mirënjohje.

Megjithatë, kjo rrugë ju jep një privilegj që pak profesione e ofrojnë: privilegjin për të qenë pranë njeriut në momentet më delikate të jetës së tij; privilegjin për të shëruar, për të lehtësuar dhimbjen dhe për të shpëtuar jetë. Ky është një mision që matet me mirënjohjen e atyre që do t’ju besojnë shëndetin dhe jetën e tyre.

Bluza e bardhë që do të vishni është simbol i këtij misioni. Ajo do t’ju kujtojë se puna juaj duhet të udhëhiqet gjithmonë nga pastërtia e mendimit, nga integriteti i veprimit dhe nga dashuria për jetën njerëzore. Uroj ta mbani atë me dinjitet, me krenari dhe me vetëdijen se çdo ditë që e vishni është një shërbim i rëndësishëm për shoqërinë.

Jini të fortë, jini të përulur dhe, mbi të gjitha, jini gjithmonë njerëzorë në çdo hap të profesionit tuaj.

Urime dhe suksese të pafundme të gjithë studentëve dhe stafit akademik të Universitetit të Mjekësisë, Tiranë!

Me konsideratë,

Prof. Dr. Xheladin Draçini

Rektor

Universiteti i Mjekësisë, Tiranë